سنڌي ٻوليءَ جي ترقي ۽ واڌاري لاءِ اهم اڳڀرائي، سنڌي ٻوليءَ جي با اختيار اداري ۽ عبدالماجد ڀرڳڙي انسٽيٽيوٽ آف لئنگئيج انجنيئرنگ جي وچ ۾ مفاهمت جي يادداشت نامي تي صحيون ٿي ويون. 

منصوبي جي پڄاڻي تي هر ماڻهو ڪمپيوٽر سان سنڌي ٻوليءَ ۾ گفتگو ڪري سگهندو: ڊاڪٽر شير مھراڻي 

سنڌي ٻولي نه رڳو ڪمپيوٽر جي سرشتي ۾ داخل ٿي چڪي آهي، پر ان ۾ ٽيڪنيڪي مھارتون پڻ منتقل ٿيون آهن: امر فياض ٻرڙو 

حيدرآباد (پريس رليز) : 

 *سنڌي ٻوليءَ جي ترقي ۽ واڌاري خاص طور سنڌي ورڊ نيٽ سسٽم ۽ ڊجيٽل لساني منصوبن ۾ گڏيل ڪوششن کي يقيني بڻائڻ لاءِ سنڌي ٻوليءَ جي بااختيار اداري ۽ عبدالماجد ڀرڳڙي انسٽيٽيوٽ آف لينگئيج انجنيئرنگ وچ ۾ مفاهمتي ياداشت تي صحيون ٿي ويون*

سنڌي ٻوليءَ جي بااختيار اداري جي چيئرمئن *ڊاڪٽر شير مھراڻي* ۽ عبدالماجد ڀرڳڙي انسٽيٽيوٽ آف لينگئيج انجنيئرنگ جي ڊائريڪٽر *امر فياض ٻرڙي* اٿارٽي جي دفتر ۾ گڏيل مفاهمتي ياداشت تي صحيون ڪيون. معاهدي موجب سنڌي ٻوليءَ جي بااختيار اداري جا پنج ملازم عبدالماجد ڀرڳڙي انسٽيٽيوٽ آف لينگئيج انجنيئرنگ جي ٽيڪنيڪل هدايتن ۽ نگراني هيٺ ڪم ڪرڻ لاءِ مقرر ڪيا ويندا، اداري پاران نامزد ڪيل پنجن ئي ملازمن کي گهربل ڪمن بابت عبدالماجد ڀرڳڙي انسٽيٽيوٽ فني تربيت ڏيندو. تربيت ورتل ملازم اسپيچ ٽيڪنالاجي ۽ سنڌي ورڊ نيٽ سسٽم ۾ حصو وٺي ڊيٽا جي ترتيب، تشريح ۽ لفظي توڙي آوازي داخلائن ۾ مدد ڪندا. معاهدي موجب ٻئي ادارا سنڌي ٻوليءَ جي بچاء، واڌاري ۽ جديد ٽيڪنالاجي سان لاڳاپيل ڪمن لاءِ گڏيل معلومات ۽ مھارتن جي مٽا سٽا ۾ ڀاڱي ڀائيوار ٿي ڪم ڪندا. ڊجيٽلائزشن ۽ ٽيڪنالاجي جي منصوبن ۾ عبدالماجد ڀرڳڙي انسٽيٽيوٽ مدد فراهم ڪندو، جڏهن ته سنڌي ٻوليءَ جو بااختيار ادارو گرامر، لغوي ۽ لساني مھارت فراهم ڪرڻ ۾ مدد ڪندو. شروعاتي طور هي معاهدو ٽن سالن تائين هوندو  جنهن کي ٻنهي ادارن جي رضامندي سان اڳتي وڌائي سگهبو. معاهدي تحت اداري پاران نامزد ڪيل ملازمن جي نامزدگي تحريري طور تي ڪئي ويندي ۽ انهن ملازمن جي پگهارن جي ادائگي سنڌي ٻوليءَ جو بااختيار ادارو ڪندو جڏهن تہ هن ڪم واسطي کين ڪو به اضافي الائونس وغيره نہ ڏنو ويندو. ٻنهي ادارن جي سربراهن *ڊاڪٽر شير مھراڻي ۽ امر فياض ٻرڙي* جو گڏيل چوڻ هو ته ٻنهي ادارن جو مقصد ئي سنڌي ٻوليءَ جي تحفظ، واڌ ويجهه ۽ ان جو نفاذ آهي، ان مقصد هيٺ ٻنهي ادارن جو هڪٻئي سان سھڪار هلندڙ آهي، ان کي عملي طور اڳتي وڌائڻ ۽ جديد ٽيڪنالاجي ۾ سنڌي ٻوليءَ کي پنهنجي جائز مقام تائين پھچائڻ لاء هي معاهدو ڪيو آهي، اميد آهي تہ هن عمل سان مثبت ۽ پائيدار نتيجا نڪرندا.